अष्टविनायका तुझा महिमा कसा

स्वस्ती श्री गणनायकम् गजमुखम् मोरेश्वरम् सिद्धीद्म्

बल्लाळम् मुरुडम् विनायक महडम् चिंतामणीम् थेवरम्

लेण्याद्रीम् गिरीजात्मजम् सुवरदम् विघ्नेश्वरम् ओझरम्

ग्रामो रांजण संस्थितो गणपती: कुर्यात सदा मंगलम्

कुर्यात सदा मंगलम्

आजचा सातवा दिवस 

२०१६ ला गणपतीच्या पहिल्याच दिवशी माझ्या वडिलांना देवाज्ञा झाली. एक  पोकळी निर्माण झाली,  त्यांच्या आठवणींची ती मी शब्दात व्यक्त करू शकत नाही. आता लिहिताना ही डोळे पाणावतात. असो त्या नंतर मनात येऊ लागले; वर्ष पूर्ण व्हायच्या आत आपण अष्टविनायक यात्रा करावी.एक दोन वेळा बुकींग करून काही न काही कारणाने ते रद्द करावे लागले. योग्य जुळून येत नव्हता. मन खट्टू होत होते. बाप्पाला मनोमन प्रार्थना करीत होते. शेवटी यांनी आणि मुलीने ठरवले आपण आपल्याच कार नि निघुया आणि जिथे जसे रहायची सोय असेल तिथे थांबून मुक्काम करत दर्शन करायचे. योग्य वेळ येणेच आवश्यक असते.

दिवस ठरला बॅगा भरल्या स्वतःच्या गाडीतून जायचे म्हंटल्यावर थोडं जास्त समान होतेच. नेमका निघायच्या दिवशी माझ्या मुलीला ताप भरला. मन धास्तावले आता परत यात्रा रद्द करायलाच लागणार. तापात इतक्या लांबचा प्रवास कसा जमणार या विचारात होतो पण ती स्वतःच तयार झाली. अगदीच कुठे दर्शन नाही घेऊ शकले तर कार मध्ये बसून राहीन अशी ही तयारी दाखवली. देवाला नारळ ठवताना कोणतीही विघ्न न येता ही यात्रा पूर्ण कर गजानना !! अशी प्रार्थना केली; आणि मार्गी लागलो.

आम्ही दर्शन याप्रमाणे घेतली 

ओझर-लेण्याद्री-मोरगाव-जेजुरी- रांजणगाव-सिद्धटेक-थेऊर-महड-पाली..... 

पण आत्ता मी अष्टविनायक गाण्यातील क्रमा प्रमाणे लिहीत आहे. 

अष्टविनायका तुझा महिमा कसा

दर्शनाचा लाभ घ्यावा भक्तांनी असा

अष्टविनायका तुझा महिमा कसा

मोरगाव - मयुरेश्वर 

गनपती, पहिला गनपती, आहा

मोरगावचा मोरेश्वर लई मोठ मंदिर

अकरा पायरी हो, अकरा पायरी हो 

नंदी कासव सभा मंडपी नक्षी सुंदर

शोभा साजरी हो, हो शोभा साजरी हो

मोरया गोसाव्यानं याचा घेतला वसा 

अष्टविनायक यात्रेतील हा पहिला गणपती मोरगावचा मोरेश्वर...असे म्हणतात या गावाचा आकार मोरा प्रमाणे होता आणि मोरांची वस्ती होती म्हणून या गावचे नाव मोरगाव असे पडले. पुण्या पासून ५५ किमी अंतरावर बारामती तालुक्यातील मोरगाव. कऱ्हा नदीच्या काठी मयुरेश्वर मंदिर स्थित आहे. या मंदिरातील मूर्ती स्वयंभू आहे. डाव्या सोंडेचा गणपती असून त्याच्या डोळ्यात आणि नाभीत हिरे जडवलेले आहेत. या मूर्ती वर नागाचे संरक्षक छत्र असून रिद्धी-सिद्धि ही आहेत. मंदिरात प्रवेश करताच उंच दगडी उंदीर आणि नंदि चे दर्शन होते. नंदि चे तोंड गणपती समोर आहे. गणपती समोर नंदि असलेले हे एकमेव मंदिर आहे. अतिशय प्रसन्न वातावरण होते. गणपती दर्शन घेऊन आणि अथर्वशीर्ष म्हणून आम्ही पुढील प्रवासाला निघालो.

थेऊर - चिंतामणी 

गनपती, दुसरा गनपती, आहा

थेऊर गावचा चिंतामनी

कहाणी त्याची लई लई जुनी

काय सांगू, आता काय सांगू

डाव्या सोंडेच नवाल केल सार्‍यांनी, हो सार्‍यांनी

विस्तार ह्याचा केला थोरल्या पेशवांनी, हो पेशव्यांनी

रमाबाईला अमर केल वृंदावनी, हो वृंदावनी

जो चिंता हरतो जगातली त्यो चिंतामनी

भगताच्या मनी त्याचा अजुनी ठसा 

अष्टविनायक यात्रेतील हा दुसरा गणपती थेऊरचा चिंतामणी थेऊर गावही पुण्या जवळ आहे, पुण्याहून पुणे-सोलापूर महामार्गावर २२किमी अंतरावर आहे.भीमा-मुळा-मुठा नदी काठी संगमावर वसलेले हे थेऊर गाव. जो चिंता हरतो मनातली तो चिंतामणी अशी या गणपतीची महती आहे. मूर्ती पूर्वाभिमुख असून देवळाचे महाद्वार उत्तरे कडे आहे. मुर्तीचे डोळे रत्नजडित आहेत. या मंदिरात एक शिव मंदिरही आहे. पेशवेकालीन मंदिर असून 'चिंतामणी' पेशवे घराण्याचे कुलदैवत आहे. माधवराव पेशवे यांनी याच बाप्पाचे नाव घेत शेवटचा श्वास घेतला. येथेच मोरया गोसावी यांनी तपश्चर्या केली आणि त्यांना सिद्धी प्राप्त झाली ;अशी कथा आहे.

असेच आमचे गणपती दर्शन माहिती आणि अनुभव उद्याच्या भागात पाहू